ليه ميخونش مصر ؟

- تقدر تقولى مصر ادتنى ايه ؟ أنا بشتغل اليوم بيومه, معنديش وظيفة ولا معاش رغم أنى خريج جامعة. لو قعدت يومين من غير شغل هنموت من الجوع أنا وعيالى. المستشفيات مبتديش دواء مجانى, والمدارس الدروس الخصوصية يا ريت المدرسة تاخد 500 جنيه فى الشهر ولا اننا ندى ولادنا دروس. تقدر تقولى ايه اللى بينى وبين الدولة ؟ يعنى أنا دلوقتى ايه اللى يخلينى مخونش مصر ؟ ايه اللى بيربطنى بمصر ؟

- أنا شاب شغال نقاش وعايش فى قودة "شرك" أنا ومراتى وولادى الاثنين, لو قعدت يومين من غير شغل أنا وعيالى نموت من الجوع.

- كل شوية يقولوا هنرفع مرتبات الموظفين وهندى حوافز للموظفين, والموظفين مش عاجبهم وبيعملوا اضراب واعتصام. طب واحنا مش شغالين فى الحكومة محدش ليه بيبصلنا ؟ نعمل ايه يعنى ؟

- انته عارف انا والراجل ده نزلنا الثورة ليه ؟ مش علشان مصر ولا علشان حاجة (*******: شتيمة لمصر), امشى مش هقولك. بس أنا توقعت هما كانوا بينزلوا ليه. كانوا بينزلوا علشان ياكلوا ويجيبوا أكل يأكلوا عيالهم.

- عارف لو ده حالى أنا بس كده, مش مشكلة أولع بجاز. انما ناس كتير كده.

ده حال ناس كتيرة فى الشارع, وطلبوا أنى أوصل صوتهم. تفتكروا الناس أصحاب المهن والمشاريع الصغيرة المستقلة (اللى عنده محل صغير أو غيره) أو أصحاب الحرف أو غيرهم اللى معندهمش دخل ثابت ملهمش حق فى البلد زينا زيهم ؟ واحد فيهم قالى أنا لو خنت البلد, البلد ليها عندى حاجة ؟ أنا مباخدش منها حاجة أصلا لو خنتها علشان أأكل عيالى حبقى خونتها فعلا !!

راقب النائب

 الشباب كلها اتجمعت فى "الكافتريا" بعدد مكانوش بيتجمعوا فيها غير علشان الماتشات, وكل الناس بتسكَت بعضها, علشان يقدروا يسمعوا بوضوح, لأن السماعات ضعيفة. ولما رئيس مجلس الشعب قال كلمته "ثورتنا مستمرة" تعالى صوت الشباب بالتكبّير وكلمات الفرح والتأييد. اخيرا بقى عندنا مجلس شعب احنا اللى اختارناه, احنا بمختلف تياراتنا وأفكارنا وأيدولوجيتنا, أصبح عندنا مجلس شعب بيعبر عننا, وكل نائب فيهم بيعبر عن نبض الشارع مش مجرد الناس اللى انتخبته. حتى الفلول منهم بيحاولوا أنهم يعملوا اللى يقدروا عليه (نتبرع بأول مرتب للشهداء يا ريّس) علشان يرضوا الشعب.


دى شوية أفكار أعتقد انها هتساعد كتير فى تحسين أداء النواب, لأن لما الواحد يبقى عارف ان الناس مراقباه وهتحاسبه على كل حاجة عملها هتخلى دايما ضميره صاحى وهتساعده انه يرجع للحق لو لا قدر الله حاد عنه, وده علشان احنا واثقين فيهم وبنحبهم, وزى ما سيدنا أبوبكر قال "أيها الناس إني قد وُليت عليكم ولست بخيركم فإن رأيتموني على حق فأعينوني وإن رأيتموني على باطل فسددوني" فلازم دايما نكون جنبهم علشان منخلقش منهم فراعنة جداد.

مينا وبطرس وجوزيف

مقدرش أنكر ولا أخفى أن طول فترة الكلية مكانش ليا أصدقاء أو حتى زملاء مقربين مسيحين, وهو مكانش بسببى لوحدى انما بسبب زملائى المسيحين برضه, لأنهم كانوا دايما فى تكتلات مع بعض. ومذكرش أنى فى فترة الكلية كان ليا علاقة غير بمينا (ومش هو اللى أقصده فى العنوان) فى سنة أولى زميلى فى السكشن لحد ما بقى كل واحد فينا فى دفعة.


خلينى أبدأ بجوزيف, كنت دايما لما بشوفه فى الكلية بحس أنه بيهرب منى أو مبيحبش الكلام معايا, ولما كنّا فى التجنيد مع بعض, كان برضه بيقعد مع زميلنا أبانوب وبيمشوا مع بعض, وبيقعدوا لوحدهم, وساعتها أنا صرحت لزميل ليا وقلتله هما بيبعدوا عننا علشان احنا مسلمين. أنا وجوزيف دخلنا مع بعض كلية الظباط الاحتياط, وشاءت الاقدار انى اكون أنا وجوزيف بناكل على طرابيزة واحدة 3 مرات فى اليوم لمدة شهر ونصر تقريبا, وبعدها فكرتى اتغيرت تماما.

متقعدش فى بيتك

ملحوظة: أنا كتبت المقال ده قبل ما أدخل كلية الظباط الاحتياط, أنا دلوقتى معزول عن العالم ومعرفش ايه اللى بيحصل برة, مش عارف الانتخابات هتتعمل فى ميعادها ولا اتأجلت, مش عارف العسكر هيسلم السلطة فى ابريل ولا هينقلبوا, لكن أنا بعمل اللى عليا, بعمل اللى أقدر اعمله. عايز أخد ثواب زيكم.


لو انته بتقرأ الكلام ده يبقى لو سمحت أنا عايز أقولك "مصر محتاجالك", وبقولك مصر محتاجالك زى ما قالها "محسن بيه" لـ "رأفت الهجان" فى مسلسل رأفت الهجان, مش زى ما قالوها "لكتكوت" فى فيلم كتكوت.

شارك فى الانتخابات علشان مبارك وعصابته ميرجعوش تانى.

لا لحكم العسكر .. سلموا السلطة

ملحوظة: أنا كتبت الموضوع ده قبل ما أدخل الجيش, وأنا حاليا مفصول عن العالم ومعرفش ايه اللى بيحصل برة, ومش عارف هبقى عايش ولا ميّت وانتوا بتقروا الكلام ده, بس أنا عايز أشارك معاكم ومفيش قدامى وسيلة تانية للمشاركة غير أنى كتبت الموضوع ده وأطلب منكم وأشجعكم كلكم على المشاركة فى الجمعة دى.

مش هقدر أنزل معاكم بكرة لأنى فى كلية الظباط الاحتياط فى فايد, لكن محدش يقعد فى بيته بكرة, انزل ومترجعش إلا والمطلب متنفذ, حتى لو هتبات فى التحرير شهر, مقدامناش غير أننا ننزل ونعمل اللى علينا. انزل واوعى تمشى, واوعى الميدان يبان فيه أن المطلب ده مطلب فئة معينة أو تيار واحد. علشان ننجح لازم نرجع لروح التحرير أيام الاعتصام.

45 يـوم

مرة كتبت حاجة كان عنوانها "النهاية" وكنت معتقد ان دى النهاية فعلا, وكنت فقدت الأمل نهائيا. لكن ربنا عزوجل بعدها بفترة قدر أنه يكون فى فرصة تانية, وطلعت النهاية مش نهاية انما بداية جديدة.


دى أخر رسالة هكتبها وأنا "مدنى" لحد ما أخلص الجيش. وهى لعامة الناس وخاصتهم, لأهلى وأصدقائى والناس اللى بحبهم :). محبتش عنوان رسالتى دى يكون فيه نوع من الوداع أو اليأس, لأنى اتعلمت من درس "11.11.11" أن ربنا بايده كل حاجة وممكن ييسر كل حاجة ويجعلنا الخير فى الحاجات اللى عمرنا ما نتخيل ولا نتوقع أن فيها خير. ويرزقنا الخير بطرق أبعد من اللى احنا بنتصورها. 45 يوم هى أول وأطول فترة (متصلة) هقعدها فى كلية الظباط الاحتياط فى فايد منقطع عن الدنيا واللى فيها.

اتصورت الصورة دى النهاردة علشان لو حد عايز يشوفنى قبل ما أدخل الجيش, أو يعملى عمل ;)

11.11.11

اليوم ده كنت بتمنى و مخطط أنه هيكون يوم تاريخى فى حياتى وحياة ناس تانية, جه اليوم واللى كنت مخططله متحققش النهاردة, احساس مش سهل أبدا أن حلم من احلامك ميتحققش. وبعد النهاردة مش عارف هيتحقق ولا لأ (بس أنا لسه عندى أمل وحسن ظن بربنا). مش مهم ايه الحدث اللى كان هيبقى تاريخى, بس المهم ليه محصلش ؟ وايه اللى انا استفدته وحابب أشاركم بيه.